Da warn doch kürzlisch de Weltmeistorschaftn in dor Leichtathletik. Da hat Deutschland nisch eene Medallje geholt. Nee, nisch eene eenzsche! Nisch ma eene kleene zerlatschte Bronzemedallje! Keene! Wo mir doch frühor sogar de Amis besieschd ham! Un de Wessis hattn den Armin Harry!
Mir warn ma wer im Sport! Odor im Fußball! Abor ooch unsre Fußballor sin zuletzt nisch Weltmeestor geworden. Männor nisch, un de Frauen ooch nisch! Bei die Fußball-Clubs geht's ja immor noch. Die haltn noch ganz gut mit - so in dor Champions-Lieg un so. In den Clubs sin abor ehm die ganzn Ausländor mit dabei, die aus dor ganzn Welt zusammgekooft wern. Da kömmor noch ganz gut mithalten - Bayern Münschn odor ooch Leipzisch! Un Dortmund…
Abor ohne Ausländor…? Was is denne da los? Sin mir Deutsche am Ende von unsorer körperlichen Leistungsfähigkeit angekomm? Is dor Gen-Pool erschöpft? Bei de geisdischn Fähigkeiten sin mir ja ooch nisch mehr sehr vorbildlich. Deutschland das Land dor Dichtor und Denker! De Erben von Goethe un Marx! Frachn se ma ihre Enkel, ob die wissen, wer Goethe odor Marx gewesn sin. Die zückn bestenfalls ihr Handy un dun googeln. Nee, de Verblödung steischd unoffhörlisch! Du kannst schon manschma nisch mehr unnorscheiden, ob eenor Demenz hat, oder bloß doof is. Un das ganze Theater geht ehm schon bei unsre Kindor los! Statistisch is das durchschnittliche deutsche Schulkind fünf Kilo zu schwer, hat eene Allgemeinbildung wie zwee Eemor Sand, und is off hundert Metern drei Minuten zu langsam. Is das nu alles eene Folsche vom Wohlstand? Odor globallisierde Digidagidallisierung?
Euer News-Tipp an die Redaktion