Freun Sie sich ooch schon so, wenn mir bald Kuldurhaubdstadt sin?! Un ganz Euroba dud dann nach Chemnitz guckn! Das Moddo heeßd ja: C the unseen! Das is englisch un bedeutet - mor soll den Blick auf Ungesehenes rischdn. Also, wenn isch das rischdisch begriffn hab. Stelln Sie sich vor, es däde e Moddo in Deutsch gähm! Was jedor gleisch begreifn däde! Nee! C se Unsinn! - sachd meine Elfriede.
Jednfalls - viele wern ooch komm un sisch unsorn Nischl in leif anguckn. Odor de bunde Esse! Was? Sie firschdn sisch? Was sie ham Angsd, dass Sie bersönlisch den eischnen Hindorn hochhievn müssn. Een ganzn Ahmd ohne Glotze? Nee, keene Angsd! Kuldurhaubdstadt dud ja nisch bedeutn, dass mir Chemnitzer selbor irschendwelsche kuldurellen Agdividädn über uns ergehn lassn müssn! Nee!
Womeeschlisch ins Theador? Odor in de Obor? Nee, das solln ja die machen, die uns in Chemnitz heimsuchn dun. De Gäsde! De Douristen! Nee, keene Angsd! Mir müssn nisch midmachn. Dazu gibds ja ooch jede Menge Künstlor. Geld für Honorare is genuch da. Es wird ja schon jedzde emsig gewerkeld. Ooch die, die das alles organisiern dun, müssn nisch am Hungorduch naachn. Nee, Sie brauchn keene Angsd zu ham - de Kuldur wird Sie nisch überrolln. Kuldur is ja e vielschischdischor un lebendischor Organismus. Chemnitz is da heeschdens dor Blinddarm. Un die ganze Welle dud dann ooch garandierd ganz schnell widdor abebbn. Wenn das Geld alle is. Nee, isch freu misch!
Tschüß Ihr Ede!
Euer News-Tipp an die Redaktion