Wobei die mid ihrer Zeidreschnung nadürlisch nisch bei dor Geburt Christi anfang dun. Mit 'alle Zeidn' meenen die Meteorolochn die letztn Jahrzehnte, seid es ehm globale Messungen mit Indornetz und so gehm dud. Was vorher gewesn is, weeß ja keenor. Abor ehm in de letztn Jahre…Klimaerwärmung… eene Hitzewelle nach dor andorn… ja, eene Zuwami folsch dor näschsdn! Zuwami?

Abkürzung von: Zu warm für mich! Tsunami - das war ja: Tsu nass für mich!

Un isch muss sachn, isch habe den Vordacht, dass die Rescht ham, die Klimabropheten. Die registriern ja heudzudaache werglisch jedes Grad, was irgendwo in dor Welt zuviel is. Jedor Reeschntropfen, der nisch falln dud, wird tabellarisch erfasst. Ma ganz abgesehn von Gewiddorn, Stürmen un Mondfinsdornisse. Da geht keene Wetterlache verlorn. Alle Extreme wern offgezeischnet.  Friehor haste das ja gar nisch erfahrn, wenn in Mexiko e ganzer Völkerstamm badn gehn musste. Odor wo damals die Eskimos ihr grünes Land - dasse Grönland genannt ham- zu über 80 Brozent an das Festlandeise verlorn ging…? Wer hat das offgezeischnet? Abor - mor muss ja alles bositiv sehn! Vielleischd grischn mir ja erschd  jetzte e rischdisch brima Klima? Mid dor Erwärmung! Un die Küsten von  Skandinavien wern die neue Cote Azur? Das däde die Finnen bestimmt freun. Un dort dädn die viel überflüssigen Seen austrocknen un de Mückn dädn ihrn Lebensraum verliern. Un annerschwo, dort wo jetzt schon Wüste is, dort kanns ja eischendlisch nisch viel wüster wern.  Un außordem - wenn das Klima bißl wärmer wern dud, da sparn mit doch global unheimlisch viel Energie ein. Beim Heizn, beim Kochn, bei alles, wo was heeß gemachd wern muss! Ooch bei Stahl un bei Benzin. Ooch beim Bierbraun!  Had das ma eenor ausgereschned? Es lebe de Klimaerwärmung!